Partiya Wekhevî û Demokrasiyê ya Gelan (DEM Partî) bi dirûşma “Em ê Rê Nedin Darbeya Qeyûman” li Qada Esenyurtê destserkirina Şaredariya Colemêrgê şermezar kir. Di mîtînga ku rêxistinên girseyî yên demokratîk bi taybetî nûnerên partiyên siyasî beşdar bûn de tîşortên “Qeyûm bicehime” li xwe kirin. Di daxuyaniyê de pankartên “Ji bo şikandina tecrîdê ji bo azadiyê dengê xwe bilind bikin” û “Şaredarî yên me ne, em ê destûrê nedin desteserkirinê” hatin vekirin. Di çalakiyê de dirûşmên “Bijî berxwedana Colemêrgê”, “Qeyûm biçe”, “Em ê bi berxwedanê bi ser bikevin” û “Jin jîyan azadî” hatin berzkirin.
Hevserokê DEM Partiyê yê Stenbolê Mûrat Kalmaz diyar kir ku ew zîhniyeta desteserkirina vînê qebûl nakin û got, “Mafê we nîne ku hûn ti şaredariyê bi rê ve bibin. Ev zîhniyet zîhniyeteke faşîst e û li ser Kurdan tê meşandin. Dem demaku her kes xwedî li şaredariyê derkevin. Ger hûn îro li dijî vê dernekevin, hûn ê nikaribin xwedî Stenbolê derkevin. Em vê zîhniyeta heyî şermezar dikin.”
‘EM Ê WEKE SEYÎD RIZAYAN LI BER XWE BIDIN’
Parlamentera DEM Partiyê ya Dersimê Ayten Kordû jî diyar kir ku ew ê ti carî serî li ber polîtîkayên zextê yên hikûmetê netewînin. Kordû anî ziman ku ew ê li hemberî destserkrina vîbê bêdeng nemînin û got, “Em ê bi gelên Tirkiyeyê re li dijî polîtîkayên dij jinê û li dijî nasnameyê berxwedana xwe bidomînin. Em ê weke Seyîd Rizayan li ber xwe bidin û têkoşîna xwe bidomînin.”
‘EV QÊRÎN QÊRÎNA HER KESÎ YE’
Serokê CHP’Ê yê Esenyurtê Huseyîn Ergîn jî got, “Ev qêrîn, ev berxwedan ne tenê qêrîna DEM Partiyê ye, di heman demê de qêrîna her kesên ku bêmaf hatine hiştin e. Ya girîng wijdan e. Yên li vir kom bûne dizanin ku destserkirin binpêkirina mafan e, sûcê li dijî mirovahiyê ye. Ez vê têkoşîna we silav dikim.”
‘FAŞÎZM JI BEŞÊN RÊXISTINBÛYÎ DITIRSE’
Herî dawî Hevberdevkê Kongreya Demokratîk a Gelan (HDK) Cengîz Çîçek axivî û diyar kir ku ew ê ti carî dest ji têkoşînê bernedin û wih axivî: “Em weke DEM Partiyê dibêjin ku desthilatdariya AKP-MHP’ê bi salan e hewl dide rejîma yek zilamî ava bike. Ji bo şikandina dorpêçê li vir tenê yek rê heye. Faşîzm beşên rêxistinkirî yên mîna Kobanê û Geziyê ditirse. Divê em soz bidin hev û xwe birêxistin bikin. Mesele ne tenê qeyûm e, helbet mafê dengdanê û hilbijartinê girîng e. Polîtîkaya şer a ku sed sal in li ser gelê Kurdan tê ferzkirin heye. Lewma em soza têkoşînê didin.”
‘3 SAL IN EM DENGÊ JI ÎMRALIYÊ NABIHÎZIN’
Çîçek, gotinên Serokê AKP’ê Tayyîp Erdogan ên li ser destserkirina Şaredariya Colemêrgê bi bîr xist û got, “Em ji vir bang li Erdogan dikin, de biçe! Ev 3 sal in em dengê birêz Ocalan nabihîzin. Yên ku dibêjin qeyûm qanûnî ne, qanûnên li Îmraliyê betal kirine û mafên kedkar û jinan desteser kirine. Qeyûm destwerdanek li hemû qadên me yên jiyanê ye. Divê em ji vê re bibêjin na.”
CIWAN MEŞIYAN
Li aliyê din polîsên ji bo çalakî bi girrseyî derbas nebe di nava hewldanên astengkirinê debûn, êrîşî ser welatiyên dixwestin bi komî beşdarî çalakiyê bibin, kirin û welatî binçav kirin. Nehat zanîn ku kesên hatine binçavkirin birine ku derê.
Çalakî bi meşa ciwanan a li kolanên nêzî çalakiyê bi berzkirina dirûşman bi dawî bû.
